Categories: اخري

الست منيرة

بطل القصة : محمد لاشين
محمد اتخرج من كلية التربية قسم تاريخ,وطبعا زي اي حد لسه متخرج كان كله امل انه يلاقي شغلة حلوة , وكان كل حلمه انه يشتغل في مدرسة خاصة , وكان زي اي شاب عنده احلامه وطموحاته .. كان عاوز يشتغل ويجيب شقة وعربية ويلاقي بنت الحلال اللي هتكمل معاه حياته , وعشان هو كان كله حماس واراده انه يحقق احلامه مرضيش يستني لما يلاقي وظيفة حكومية , وبدأ يدور علي شغل في المدارس الخصوصية في “إلمنيا” بس ملقاش شغل عشان هو كان اتأخر والترم الاول بدأ , وكان صعب عليه انه يلاقي شغل في اي مدرسة , خصوصا انه كان لسه متخرج جديد ومعندهوش خبرة ,, فقال انا هشتغل اي شغلة تانية لحد ما الاقي وظيفة لاني مش هينفع افضل عالة علي اهلي.. وبالفعل اشتغل في احد المطاعم الشهيرة لتوصيل الوجبات السريعة “ديلفري” ومرفضش الشغلة دي ولا قال انا مينفعش اشتغل زي كده ولا حاجة , لانه كان متواضع وكان عاوز اي شغل عشان يحسن حالته المادية .. بدأ محمد الشغل واستمر حوالي تلات شهور لحد ما جالو مكالمة هاتفية من صاحبه وزميله في الجامعة مصطفي شحاته من الاسكندرية
مصطفي كلم محمد وقاللو:يامحمد في مدرسة خاصة هتفتح جديده عندنا , هات ورقك وتعالي ..محمد فرح بالخبر ده جدا وجهز ورقه واخد اجازة من شغله وفي اليوم التاني كان في القطر اللي رايح اسكندرية
مسك الموبايل وطلب مصطفي وقعد يدردش معاه ويحلم بقي باللي هيحققه وكان طاير من الفرحة …بدا يتخيل ويحلم بنجاحه كمدرس وانه هيعمل فلوس كتير وهيدي دروس خصوصية ويا سلام كمان لو لقي بنت الحلال مدرسه معاه في المدرسة …… وقعد يحلم ويفكر ……….
وفجأة وهو بيحلم وهو بيكلم مصطفي في التليفون قاطعه صوت بيقوللو :يا استاذ يا استاذ ,وصلنا اسكندرية , انت تعبان ولا حاجة!
محمد بصلو وقاللو : ايه تعبان دي , انت شايفني بشد في شعري ,, انا قدامك اهو بكلم صاحبي في التلفون …
فالراجل قال : لاحول ولا قوة الا بالله .. ربنا يشفيك يابني …
نزل محمد في محطة “سيدي جابر” ولقي صاحبه مصطفي مستنيه وطبعا اخده بالحضن .. ومن غير ما اطول عليكم .. كان لقاء حار جدا ومليئ بالاحضان زي اي اتنين اصحاب متقابلوش من فترة….
المهم : راحو علي المدرسة وكانت في منطقة شبه مهجورة
قدم محمد ورقه واتقبل في نفس اليوم وطبعا الفرحة مكانتش سايعاه .. واتفقو معاه انه هيشتغل من بكره , وهيدرس لاولي ثانوي..
محمد كان فرحان بس كانت في حاجة ناقصة .. السكن
هيسكن فين . وازاي هيلاقي شقة النهارده , وكمان محتاج شقة رخيصة .
بس دي مكانتش مشكلة
لان مصطفي مفاتتش عليه الحكاية دي وكان مجهز لمحمد شقة متواضعة في عمارة قديمة في حد قديم كده وقاللو: من الناحية دي متعولش هم .. انا مجهزلك شقة محندقة كده عشان تقعد فيها لحد ما ربنا يكرمك وتقدر تاخد شقة كويسة
طبعا محمد فرح بالكلام ده وحس قد ايه صاحبه مصطفي بيحبه وبيفكر فيه
المهم…
مصطفي اخد محمد وراحو علي الشقة , واو ما وصلو عند العمارة كان منظهرها قديم ويثير الرعب وهما داخلين العمارة محمد حس بتيار هوا شديد بيخبط فيه وهو داخل وكان مش مجرد هوا عادي ,, لا ده كان فيه ريحة غريبة كده,بس محمد مهتمش وقال لنفسه ..هو انا هتنك من اولها واقول الريحة ومش عارف ايه..
واو ما دخلو الشقة محمد بص عليها كده ولقاها قديمة قوي ومتهالكة وكان فيها زي ما يكون ريحة خشب قديم علي ريحة تراب علي ريحة تالته هو مكانش عاوز يصدق انها موجوده .. ريحة خلته يقلق .. بس هو اخد الموضوع ببساطة وقال : ده شغل بقي ولازم استحمل شوية عشان احقق احلامي وبعدين انا مش هقعد هنا علي طول .. دي كلها كام شهر لحد ما ظروفي تتحسن وبعد كده اسكن في المنطقة اللي تعجبني …
مشي مصطفي ومحمد بدأ رحلة التنظيف..
محمد قال انا هنضف الشقة ..انا راجل متعود علي النضافة ومش هينفع اسكن فيها بحالتها دي ..بدأ محمد في تنظيف الشقة وكان منهمك جدا في عمله وكان بينضف الشقة ولا اجدع بنت 😀
محمد كان بينضف في الشقة وعمال يغني وهو بينضف وكان مبسوط جدا لان احلامه بدأت تتحقق….
وفي عز ماهو بينضف الشقة سمع صوت…الصوت ده لا نقدر نقول برق ولا رعد ولا ضرب نار ولا شئ معين .. هو كان صوت وخلاص؟
كان صوت ايه .. اكيد محتاجين نعرف محمد سمع ايه ؟.. الصوت اللي سمعه محمد كان صوت موسيقي….♫ ♪ ♪ ♥
ايوه صوت موسيقي قديمة زي اللي كان بيلحنها عبدالوهاب وغيرها من الحان هذا الجيل .. كانت موسيقي تميل اللي البلدي بس كانت هادية وحلوة … زي بتاعة ليالي الونس
المهم
محمد ركز شوية ..لقي الصوت اختفي .. قال في نفسه , ربنا يهدي ..اهو اللي شغل المزيكا بطلها تاني …
محمد كان هلكان وتعبان جدا من تنضيف الشقة وكان مخلصهاش كلها تنضيف بس مكانش قادر يكمل فقال انا هنام وبعدين ابقي اكمل…
محمد اترمي علي السرير وراح في سابع نومة …..
في عز النوم محمد سمع حاجة زي وشوشة..بدأت تتسلل لودانه وتقرب منه ..وهو نايم
والوشوشة كان بتقرب منه وحده وحده والصوت عمال يقرب …… وفجأة وهو لسه بيحلم شاف واحده “سيدة” بتقرب منه وهي كمان عمالة تهمس بكلام مش واضح … في الوقت ده محمد قام من النوم وقال يا ستير يارب ..ايه الصوت ده ….. محمد فاق من النوم وكان الموضوع ده عادي يعني مجرد حلم … فنام تاني……….
واتكرر نفس الحلم مره تانية ………
وتالته ورابعة …. وكل يوم محمد كان بيشوف الست دي في المنام
وكانت بتهمس بكلام غير مفهوم وبيسمع المزيكا دي ♫ ♪ ♪ ♥♫ ♪ ♪ ♥
والموضوع بقي بيحصل يوميا
فمحمد جه في يوم وقرر انه هيفضل صاحي وقال : انا هفضل قاعد وهشوف ايه اللي هيحصل ………
محمد غلبه النوم المره دي كمان وصحي علي صوت الهمس والمزيكا ♫ ♪ ♪ ♥
قرر محمد انه يخرج من الشقة ويشوف الصوت ده جاي منين
يعني الناس و الجيران المتعبين والمزعجين دول زودوها ……
خرج محمد من الشقة وبدأ يدور في العمارة دور طالع ودور نازل يدور علي اي حد , هي العمارة دي مفيهاش حد ولا ايه..
محمد وهو طالع من الشقة الصوت كان موجود
واول ما خرج ,,مفيش صوت !!
استغرب ودخل الشقة تاني لقي الصوت راجع , فخرج من الشقة …… الصوت راح !!
قرر محمد انه هينام وبكره الصبح هيشوف ايه حكاية العمارة الغريبة دي والناس اللي مراقبينه دول وبيلعبو بأعصابه
وبالفعل محمد اول ما صحي بدأ يخبط علي ابواب العمارة شقة شقة
واكتشف ان العمارة مفيهاش غير 3 شقق هما بس اللي مسكونين في العمارة والباقي مفيهوش حد
الشقة الاولي صاحبة الشقة مرضيتش تفتحلو والظاهر انها خافت منه لان زوجها مش موجود وهي لوحدها
والشقة التانية لقي فيها طفلين بس مفهموش منه اي حاجة ولا هو فهم منهم اي حاجة
الشقة التالتة لقي ست عجوزة جدا , واول ما فتحت الباب ومحمد سألها عن الصوت ده وقال لها : ايه حكاية المزيكا اللي عندكم دي , انا مش بعرف انام منها
الست مستنتش لما محمد يخلص كلامه وقاطعته : ماتمشي من هنا , ايه البلاوي اللي بتتحدف علينا دي احنا ناقصينكو
محمد اخد الكلمتين دول وقال : لا اله الا الله .. الست دي غريبة جدا وواضح انها عندها حالة نفسية او مريضة .. انا همشي احسن , خرج محمد وهو كله حيرة وراح المدرسة وقابل مصطفي زميله وقال احكيله علي اللي حصل : يا مصطفي الشقة دي فيها حاجة غريبة , وبعدين ايه حكاية الست الغريبة اللي اسمها منيرة دي
مصطفي اخد الموضوع هزار وقال : دي تلاقيها هلاويس تنضيف الشقة يا صديقي , وبعدين منيرة مين ,, دي تلاقيها لسه ساكنه جديد
افرح يا عم , اديك لقيت شقة وعروسة كمان
محمد قالو لا لا دي مش هلاويس ولا حاجة
وانا بقي هفضل وراء الناس اللي بيلعبو باعصابي دول لحد ما اعرف هما بيعملو كده ليه
محمد قرر انه مش هينام الليلة دي وعمل براد قهوة كبير وقعد يشرب في القهوة وفعلا منامش المرة دي
وبدأت المزيكا تظهر ♫ ♪ ♪ ♥♫ ♪ ♪ ♥
محمد كان هيتجنن خلاص
كل ما يخرج من الشقة الصوت يختفي واو ما يدخل الصوت يرجع
محمد قال معناه ايه الكلام ده ! المزيكا دي عندي في البيت ولا ايه
محمد كان محتار وبيفكر في اي تفسير منطقي وقال انا هدور علي الصوت ده جاي منين بالظبط
بدا محمد يركز ويشوف الصوت ده جاي منين وبدأ يدور في الشقة ولاحظ ان الاوضة التانية اللي مبينامش فيها واللي مدخلهاش من ساعة ما سكن في الشقة دي لانه مكانش محتاجها
محمد لاحظ انه كل ما بيقرب من الاوضة دي الصوت بيعلي , كل ما يقرب الصوت يزيد ♫ ♪ ♪ كل ما يقرب الصوت يزيد ♫ ♪ ♪
معني كده ان الصوت طالع من الاوضة دي ♫ ♪ ♪ ♥♫ ♪ ♪ ♥♫ ♪ ♪ ♥♫ ♪ ♪ ♥
محمد فتح باب الاوضة واول ما دخل ……..
الصوت راح !!
صمت رهيب في الاوضة دي . . . .
محمد بدأ يدور في الاوضة دي عن اي حاجة ,, ولقي ورق كتير ولقي كمان صورة كبيرة ,, الصورة دي لراقصة , واحده متصورة وهي ببدلة الرقص
ده عادي , انما اللي مش عادي ان محمد اول ما شاف الصورة افتكر ان الست دي هي نفس الست اللي بتجيله في الاحلام !!
محمد فضل صاحي للصبح وهو بيفكر , مين الست دي , وليه بتجيلي في المنام
محمد اخد الصورة وراح خبط علي الست منيرة واول ما فتحت الباب قاللها : قبل ما تزعقي , مين صاحبة الصورة دي , ردي عليا ,انا مش همشي الا لما تحكيلي….
الست العجوزة سكتت شوية وبعدين قالتلو اتفضل اقعد جوا
وبدأت تتكلم : اه امال ايه , دي كانت اجمل فنانة في اسكندرية ييجي من تلاتين سنة وكانت الناس بتتجنن عليها , يلا الله يمسيها بالخير او يرحمها لو ماتت
محمد اتدايق من طريقة كلام الست وقال لها انا بسألك مين دي مش عاوز اعرف تاريخها, انا عاوز اعرف دي مين وهي فين؟
ردت عليه : دي اختفت فجأة من فترة طويلة وسابت شقتها وحاجتها ولا حد عرف عنها حاجة ولا حس ولا خبر , وفضلنا ندور ندور ومحدش سكن الشقة من وقتها إلا انت ,, شوف بقي لمعلوماتك , كان في واحد بييجي يزورها وكانو بيقولو انه متجوزها عرفي وكان اسمه منصور او مندور مش عارفة بالظبط
بس انت اول واحد ييجي الشقة بعدها وباين عليك انك عارفها ………….
الست كانت مملة وكلامها كتير
محمد قال انا هنسي الموضوع ده واعيش حياتي عادي خالص
بس الموضوع مكانش بإيد محمد
في نفس الليلة اتكرر الموضوع وبدأت المزيكا وشاف الست في الحلم زي كل مرة بس المرة دي كان باين عليها انها خايفة ومرعوبة , كانت بتبصله ونظراتها كلها خوف ورعب , وكانت بتشاور لمحمد علي الحيطة اللي قصاد السرير …
صحي محمد من النوم وبص علي المكان اللي كانت بتشاور عليه وهو كان بيفكر انه هيلاقي حاجة
ولقي صورة متعلقة علي الحيطة فقال في نفسه الصورة دي جواها خريطة لكنز او مقبرة من بتوع الفراعنة
محمد قام واخد الصورة وبص فيها وملقاش حاجة , بس لاحظ ان تحتها في بقع في الحيطة , محمد خاف من اللي جاء في باله, واللي جا في بالك واللي جا في بالي
لاكن ايه العمل ,, انا اكيد الصبح هبتدي ادور , لازم هدور وهحفر جوا الحيطة دي واشوف ايه اللي جواها
اليوم اللي بعد كده وبعد ما محمد رجع من المدرسة وجهز كل حاجة وجاب عدة الحفر وكانت الساعة العاشرة ليلا
وبدأ محمد يحفر ,والواضح ان مخاوف محمد ومخوفي ومخاوفك مكانتش غلط , قلب محمد كان بيدق كل لما يشيل طوبة , وحصل اللي كنا متوقعينه ….
محمد عثر جوا الحيطة علي هيكل عظمي ..
لقي الهيكل العظمي جوا الحيطة زي ما انا توقعت وانت كمان توقعت وانتي كمان توقعتي
لان زي ما بنشوف ده هو اللي بيحصل في الافلام ……
فجأة حصل اللي مكانش لازم يحصل ابدا,محمد لقي الهيكل العظمي من هنا ونور الشقة قطع من هنا
متخيلين المنظر ؛ ضلمة وريحة الموت بتحيط بمحمد من كل ناحية ,, محمد حس انه اتشل , هدوء ..صمت..ظلمة كظلمة القبر..وجثة لاتراها ولاكنك تشعر انها ستستيقظ في اي وقت كي تنقض عليك….,,,,….
بدأ محمد يحرك رجليه بصعوبة,,..,,مش قادر يمشي..,,.. وحاسس انه فقد القدرة علي الحركة
بدأ محمد بسرع ويسرع وبدأ يجري ويتكعبل في عفش البيت وكأنه ميعرفش البيت ده وخرج باقصي سرعة من الشقة وهو مرعوب وقال انا هروح للست منيرة .,,. لازم تقولي في ايه..,,.. الست دي اكيد عارفه ايه اللي بيحصل ,,..,, او حتي اجيب منها شمعة ,, لاني مش همشي غير لما اكمل اللي بدأته,,..,,..,,انا لازم افك اللغز ده ,.,., الست دي جاتلي في المنام لسبب معين ولازم اعرف ايه هو السبب ده ..,,..,,..
محمد قعد يخبط ويخبط علي باب الست منيرة بس محدش فتح ولا رد عليه
محمد سمع صوت خطوات علي السلم ..,,.. سامع خطوة فالتانية فالتالتة ,,..,,محمد بص علي السلم فلقي راجل طالع واو مره يشوفه ,,..,, فمحمد سأله : انت مين وايه اللي جايبك هنا
فرد عليه : انا اللي ساكن في الدور الاخير يا ابني , انت اللي مين
محمد قالو مليكش دعوة انا مين ,, معاكش اي حاجة انور بيها ,,..,, طلع الراجل من جيبه ولاعة فيها كشاف صغير ..,,.. فمحمد اخد الولاعة وجري علي الشقة وقال للراجل : ابقي اتطمن علي الست منيرة عشان انا خبطت عليها ومبتردش
الراجل رد باستغراب : منيرة مين يا ابني مفيش حد هنا اسمه منيرة انت تقصد مين
محمد مسمعش الراجل لانه كان دخل الشقة ورايح علي مكان الجثة , وبدأ يكمل حفر في الحيطة ..,,.. ولقي مع الجثة ورقة قديمة مكتوب فيها الآتي :-
ورقة عقد قران
الزوج هو الاستاذ : منصور البرديسي
الزوجة هي السيدة : منيرة كامل
منيرة كامل !!
بدأت الدنيا تلف بمحمد وبدأ يفتكر حواره مع الجاره
يعني ايه ! هي مليهاش وجود ولا ايه !! هي المقتولة ولا ايه !!!
محمد كان خلاص مش عارف يفكر وكل حاجة دخلت في بعضها وفجأة قطع الصمت ده , رنة الموبايل بتاعه ولقي اسم المتصل هو صديقه العزيز مصطفي شحاته
محمد مسك التليفون وهو في غاية الديق وقال لمصطفي : ايوه يا مصطفي .. عاوز ايه .. خير
محمد كان بيتكلم بانفعال
فمصطفي رد عليه وقال : ايه يا ابني انت بتتكلم معايا كده ليه ..,,.. دا انا حتي مشوفتكش من ساعة ما كنا مع بعض في الكلية !
المهم انا بتصل بيك عشان اعزمك علي خطوبتي الاسبوع اللي جاي .. اخيرا هشوفك بقي
بقولك ايه .. هو انت اشتغلت ولا لسه .. عشان انا محتار ومش لاقي شغل ..,,.. لو لقيت شغل عندك متنساش صاحبك بقي !!!!!؟؟؟؟؟؟
..
.
.
.
.
.
… هو ده اخر شئ عرفته عن محمد , ومش عارف ايه اللي حصل معاه بعد كده ؟
ممكن يكون رجع بلده
وممكن يكون تختفي ومظهرش تاني
وممكن يكون فضل عايش في الشقة دي
او حتي ممكن يكون اتجوز العفريته بتاعة الست منيرة وراح معاها في عالمها
انا فضلت اني اكتب اللي اعرفه بدون ما ازود اي حاجة في القصة من عندي وانتو بقي شوفو ايه اللي ممكن يكون حصل لمحمد…..
تحياتي : احمد٩٦

Recent Posts

خالتي أم عبده “عامية”

خالتي ام عبده-قصيدة عامية-الشاعر صلاح عبدالله خالتي أم عبده.وكنا زمان أنا وصاحبي…بنلعب كورة جوا الحوش…يشوطها… Read More

3 أشهر ago

قولوا لعين الشمس ماتحماشي

اغنية شادية قولوا لعين الشمس ماتحماشي قولوا لعين الشمس ماتحماشيايه علاقة شادية بحادثة دنشوايبص يا… Read More

3 أشهر ago

تخنقني ازمنة اللاجدوي

مقال تخنقني ازمنة اللاجدوي-احمد خالد توفيق احمد خالد توفيق - مقال تخنقني ازمنة اللاجدوي احمد… Read More

3 أشهر ago

رواية انتحار ميت ج3 | هبة الحكيم

رواية انتحار ميت الجزء 3 للكاتبة هبة الحكيم *يمكنك أيضا قراءة الجزء الأول من الرواية*تأخر… Read More

4 أشهر ago

رواية انتحار ميت ج2 | هبة الحكيم

رواية انتحار ميت ج2 | هبة الحكيم رواية انتحار ميت ج2 | هبة الحكيم طُرِق… Read More

4 أشهر ago

رواية انتحار ميت ج1 | هبة الحكيم

رواية انتحار ميت للكاتبة هبة الحكيم رواية : إنتحار ميت ( الجزء الاول ) مقدمة… Read More

4 أشهر ago